Laga av Erlend Hagen, Bård Svardal, Eldgrim Springgard og Stein Hofve.

Treng du meir straum må du søke nettselskapet, som i Hallingdal er Føie, om større hovudsikring. Det kan vera lurt å søke råd hjå ein elektrikar for å vite kor stor hovudsikring du treng. Elektrikaren sender i tillegg inn ein søknad som beskriv det tekniske arbeidet som skal gjerast. Dette er meir ein formalitet, og så snart nettselskapet godkjenner søknaden, kan arbeidet starte.

Det vanlege er å installere nytt utvendig skåp med ny hovudsikring og delvis nytt elektrisk anlegg. Det kan ofte vera like lurt å behalde dei gamle kursane, og heller legge opp nye strekk til nye elektriske installasjonar.

Før gjekk all straum gjennom luftstrekk. I dag er det meir vanleg å legge tilførselen i ein jordkabel. Viss ein likevel må grave, og trafoen ikkje er for langt unna, kan det vera like greitt å bli kvitt eit skjemmande luftstrekk. Det er netteigaren som eventuelt ordnar med jordkabel.

Dersom straumnettet er av eldre dato, kan trafoen og kablane fram, bli ein bøyg. Nettet leverer ikkje nok straum. Viss nettselskapet må utvide kapasiteten, bør hytteeigarane i området samarbeide og dele på kostnaden med å få fram meir straum. Nettselskapet vil alltid kunne levere straum, men må du ta kostnaden åleine kan prisen bli høg.

Er det nødvendig med ny hovudsikring om du installerer ny elbil-ladar? Ikkje nødvendigvis. Med ein rimeleg god hovudsikring kan den rette ladaren regulere ladinga. slik at den berre ladar når det er ledig kapasitet i hyttenettet.