Knitrande vedkubbar gir lun og god stemning og ei triveleg ramme rundt matbordet og i godkroken. Og så dette då; etter turen kunne fyre opp i omnen. Kjenne varmen og tørke tøy. Slik vil mange ha hyttelivet. Vedfyring er både kos og oppvarming. Men når du tenner på dette bålet inne i hytta, er det viktig å ha kontroll. Både eldstad og pipeløp kan vera ei brannfelle. Ofte er det vanskeleg for ein lekmann å vurdere tilstanden. Er du usikker kan det vera ei rimeleg forsikring å be om branntilsyn.

Omnsrøyr og pipeløp.
Eit vanleg pipeløp er av teglstein, leca eller stål. Teglstein og lecapiper kan etter lang tids bruk sprekke, og innvendig murpuss kan forvitre. Å sette inn eit innvendig stålrøyr kan vere løysinga. For stålpiper er det særleg takgjennomgangen som er kritisk. Ei stålpipe er sett saman av to stålringar med isolasjon mellom. I eldre stålpiper kan isolasjonen sige ned under takgjennomgangen. Utan isolasjon kan treverket rundt pipa ta fyr. Fleire hyttebrannar dei siste åra har starta på denne måten.

Eldstaden
Omnen eller peisinnsatsen må ikkje ha synlege sprekkar. Det gir unødvendig varmetap, og avgassar kjem inn i rommet. I tillegg kan treverk ta fyr.
I eldre peisomnar manglar ofte ei skråstilt varmeplate som hindrar flammane å slå opp i pipeløpet. Då forsvinn mykje varme til kråkene, og pipa er meir sårbar ved sotbrann.

Brannplate/brannmur.
Feil montert brannplate eller for dårleg brannmur kan føre til ulmebrann i treverket bak. Type eldstad bestemmer om det er behov for brannplate eller brannmur. Ofte er det krav om eit luftrom mellom brannplata og veggen bak. Forskrifter definerer kravet i kvart enkelt tilfelle.

Etter eit branntilsyn blir det laga ein rapport over manglar og avvik. For dårleg avstand og tilstand er vanlege avvik. Avvik må følgjast opp innan ein månad med ein tiltaksplan. Er avviket graverande kan hytteeigaren få fyringsforbod til feilen er retta. Eit forbod er strengt, men er til det beste for både hytteeigar og miljø.

Branntilsynet avdekte fleire manglar og avvik som blir tatt inn i renoveringsarbeidet.
Det viktigaste blir å bytte ut både pipeløpet og peisomnen i hovudhytta. I annekset må i alle fall pipeløpet skiftast ut. Begge pipeløpa er av merket Selkirk som var mykje nytta frå 70-talet og fram til på 2000-talet. Det er avdekka alvorlege manglar ved mange av desse pipene. Difor bør alle med ei slik pipe be om tilsyn.

Flammane i peisomnen i hytta går direkte opp i pipeløpet. Dette gir, i tillegg til pipeslitasje, dårleg varmeøkonomi. Rådet frå branntilsynet er å byte både pipeløp og peisomn. Ei moderne reintbrennande omn vil også halvere forbruket av brensel.