Interiøret i ei Ålhytte har vore med på same tidsreisa som sjølve hytta, og er i stadig og stødig utvikling. På jakt etter gode løysingar. Men du er aldri tvil. Hytta er ei Ålhytte og interiøret er til å kjenne att. Møblar og anna interiør var frå første stund ein integrert del av hytta. Slik er det framleis. God plassutnytting med romtilpassa løysingar går aldri av mote.

I den gamle hytta i Sangefjellvegen 123 var det knapt kjøkken, og i eit lite tilbygg var det rigga til eit svært enkelt bad. Meir straum og innlagt vatn og avløp bana veg for ei større oppgradering. Det knøttvesle kjøkkenet med ein enkel vaskekum og ei kokeplate, er fjerna. I den nye opne kjøkkenløysinga er det funne plass til både oppvaskmaskin, koketopp, steikeomn og kjøl/fryseskåp. Dei gamle skåpdørene i furu er bytta ut med trelags askedørar. Trevirke av ask er hardare og meir stabilt enn furu.

Stova er samlingsplass og opphaldsrom for hyttefolket. Dei fleste måltid foregår rundt matbordet med naturen tett på. Og i sofakroken står ei spesialtilpassa dagseng. Dagseng er fast inventar og eit varemerke i alle nye Ålhytter. Ein god krok å krype opp i med favorittboka, eller for ein liten høneblund. Ønsket er å ta vare på identiteten til hytta. Difor blir også originale møblar brukt om att, men gjerne i kombinasjon med nyskaping frå interiørarkitektane i Ålhytta. Eit eksempel er den nye sofabenken, der skumplast på harde fjøler er bytta ut med ein fjørmadrass.

Systugu har vore viktig for Ålhytta sidan oppstarten på 60-talet. Her blir det laga formsydde puter. Spesielle mål er ingen hindring. Systugu lagar også blendingsgardiner i ull til bruk på soverom. Ein annan lokal leverandør lagar dei spesialtilpassa furugardinene som har blitt del av den klassiske utsjånaden til ei Ålhytte.

I den oppgraderte hytta i Sangefjellvegen 123 har det vorte plass til eit ekstra soverom, og ombygginga gir ei betre romløysing. Ingen treng lenger å gå gjennom soverommet for å komme til badet. Og det største soverommet har fått plass til ein liten arbeidsbenk under eine vindauget. Alle sengene blir bygd ferdige i soverommet. Resultatet blir ei kompakt løysing utan daudplass. Garderobeskåp er også produsert etter mål som passar inn i modulen. Under alle senger er det støvtette skuffar til oppbevaring.

Sangefjellvegen 123 er frå 70-talet. Den gongen var Ålhyttemodulane mindre. Plasseffektive løysingar blir ekstra viktige. Ved ombygging vart veggen mellom kjøkken/stove og gang forma som ein S. Med dette fekk gangen ei nisje til skohylle og garderobeplass. Kjøkkenet på motsett side fekk ei passe stor nok nisje til kjøl/fryseskåp. Og for det tredje vart det eit tydeleg dele mellom gang- og opphaldsareal. Reine kinderegget.